ප්‍රජාතන්ත්‍රවාදය සහ පාලනය පිළිබඳ ආයතනය (IDAG) සහ දේශපාලන පීඨය (IOP) විසින් පවත්වනු ලැබූ ප්‍රජාතන්ත්‍රවාදය, විමධ්‍යගත කිරීම සහ පළාත් පාලනය පිළිබඳ විධායක ඩිප්ලෝමා පාඨමාලාවෙන් සමත් වුවන් සඳහා උපාධි ප්‍රදානෝත්සවය පසුගිය දා ශ්‍රී ලංකා පදනම් ආයතනයේ පැවැත්විණි.
මෙම අවස්ථාවට ප්‍රජාතන්ත්‍රවාදය, විමධ්‍යගත කිරීම සහ පළාත් පාලන ක්ෂේත්‍රයන්හි කැපී පෙනෙන පුද්ගලයන්, ආයතනයේ ආචාර්ය මණ්ඩලය සහ උපාධිධාරීන් රැසක් සහභාගී වූහ.
මෙම අවස්ථාවේ දී, මහාචාර්ය අමින්ද මෙත්සිල පෙරේරා, මහාචාර්ය ලක්ෂ්මන් ආර්. වටවල සහ IDAG ආයතනයේ නිර්මාතෘ ශ්‍රී ලංකාභිමාන්‍ය ගරු කරු ජයසූරිය යන මහත්වරුන් සභාව ඇමතු අතර විශේෂ දේශනය සිදුකළේ බැවේරියා හි ශ්‍රී ලංකාවේ ගෞරවනීය කොන්සල් ජනරාල් සහ ජර්මනියේ යුනිසෙෆ් හි නියෝජ්‍ය සභාපතිනි ඩැග්මාර් වොහ්ර්ල් මහත්මිය වන අතර, ප්‍රජාතන්ත්‍රවාදය, විමධ්‍යගත කිරීම සහ පළාත් පාලනයේ වැදගත්කම පිළිබඳව ඇයගේ වටිනා අදහස් උපාධිධාරීන් සමඟ බෙදා ගැනීමට ඇය කටයුතු කරනු ලැබීය.
මෙම උත්සවයේ වැදගත්ම අවස්ථාව වූයේ උපාධිධාරීන් වෙත ඩිප්ලෝමා පිරිනැමීමයි. එමඟින් මෙම වැඩසටහන පුරාම ඔවුන් දැක්වූ කැපවීම ඇගයීමට ලක් කෙරිණි. උපාධිධාරීන් අතරින්, කනිෂ්ක ලනරෝල් මහතා ඔහුගේ කැපී පෙනෙන අධ්‍යයන කුසලතාව වෙනුවෙන් විශේෂ පදක්කමකින් පිදුම් ලැබී ය.
ප්‍රජාතන්ත්‍රවාදය, විමධ්‍යගත කිරීම සහ පළාත් පාලනය පිළිබඳ විධායක ඩිප්ලෝමාව මෙම තීරණාත්මක ක්ෂේත්‍රයන්හි දක්ෂතා දැක්වීමට අවශ්‍ය දැනුම හා කුසලතා පුද්ගලයන්ට ලබා දීම සඳහා නිර්මාණය කර ඇති අධ්‍යයන වැඩසටහනකි.
