ජනාධිපති අනුර කුමාර දිසානායක මහතා විසින් ශ්‍රේෂ්ඨාධිකරණයේ විනිසුරු පුරප්පාඩුවක් සඳහා අභියාචනාධිකරණ වැඩබලන සභාපති එම්.ටී. මොහොමඩ් ලෆාර් මහතාගේ නම නිර්දේශ කිරීම සම්බන්ධයෙන් ඡන්ද විමසීමක් සිදුකිරීමට අද රැස්වූ ආණ්ඩුක්‍රම ව්‍යවස්ථා සභාව තීරණය කරන ලද බව InfoSriLanka.lk ආරංචි මාර්ග අනාවරණය කරයි.
එම ඡන්ද විමසීම ආරම්භ කිරීමට සූදානම්වත්ම ආණ්ඩුක්‍රම ව්‍යවස්ථා සභාවේ ජනාධිපතිවරයාගේ නියෝජිතයා ලෙස කටයුතු කරන අමාත්‍ය බිමල් රත්නායක මහතා විසින් ජනාධිපතිවරයා ඉදිරිපත් කරන ලද නම ඉවත් කරගන්නා බව දැනුම් දීමත් සමග ඡන්ද විමසීම සිදු නොකළ බව වාර්තා වෙයි.
එළඹෙන ජූනි 20 වැනිදා ඇතිවන්නට නියමිත ශ්‍රේෂ්ඨාධිකරණයේ විනිසුරු පුරප්පාඩුවක් සඳහා පත්කරන ලෙස, අභියාචනාධිකරණ වැඩබලන සභාපති එම්.ටී. මොහොමඩ් ලෆාර්ගේ නම ජනාධිපතිවරයා ආණ්ඩුක්‍රම ව්‍යවස්ථා සභාවට යවා ඇත්තේ පසුගිය ජූනි 09 වැනිදාය.
එහෙත් ශ්‍රේෂ්ඨාධිකරණයේ විනිසුරු ධූරයක් හිස්වන්නට නියමිතව ඇත්තේ ජූනි 20 වැනිදා වන අතර ඒ විනිසුරු ගාමිණී අමරසේකර මහතා විශ්‍රාම ගැනීම නිසාය.
සාමාන්‍යයෙන් ශ්‍රේෂ්ඨාධිකරණ විනිසුරු ධූරයක් පුරප්පාඩු වනතෙක් එම ධූරය සඳහා නාම යෝජනාවක් ජනාධිපතිවරයා විසින් ආණ්ඩුක්‍රම ව්‍යවස්ථා සභාවට නොයවන බව එම ක්ෂේත්‍රයේ ප්‍රවීනයෝ කියති.
ඒ අතර වාර්තා වන්නේ, අභියාචනාධිකරණ සභාපති මොහොමඩ් ලෆාර් මහතා, මෙම ජූනි මස 18වැනිදා (එනම් ශ්‍රේෂ්ඨාධිකරණ පුරප්පාඩුව ඇතිවීමට දින දෙකකට පෙර) සිය වයස අවුරුදු 63 සම්පූර්ණ වීම නිසා විශ්‍රාම ලැබීමට නියමිත බවයි.
ජනාධිපතිවරයා ලහි ලහියේ ඔහුගේ නම ආණ්ඩුක්‍රම ව්‍යවස්ථා සභාවට යවා ඇත්තේ, ඔහු විශ්‍රාම ගැනීමට පෙර ශ්‍රේෂ්ඨාධිකරණයට පත්කිරීමට විය හැකි බව වාර්තා වේ.
(ශ්‍රේෂ්ඨාධිකරණ විනිසුරුවරුන් විශ්‍රාම ගන්නේ වයස අවුරුදු 65 දීය) එහෙත් එවැනි සම්ප්‍රදායක් අධිකරණ ක්ෂේත්‍රයේ මෙතෙක් පැවැත නැතැයි අධිකරණ ආරංචි මාර්ග කියයි.
ආණ්ඩුක්‍රම ව්‍යවස්ථාවේ 41 (ඇ) ව්‍යවස්ථාවට අනුව ආණ්ඩුක්‍රම ව්‍යවස්ථා සභාව ඉහළ අධිකරණවලට පත්කිරීම් පිලිබඳ සිය තීරණය ගැනීමට පෙර අගවිනිසුරුවරයාගේ / වරියගේ අදහස විමසිය යුතුය.
ඒ නිසා අගවිනිසුරු නිර්දේශය එම විනිසුරුවරයා / වරිය නම් කිරීමට පෙර ලබා ගැනීම සාමාන්‍ය සම්ප්‍රදාය වෙයි.
එහෙත් දැනගන්නට තිබෙන පරිදි ලෆාර් විනිසුරුවරයා සම්බන්ධයෙන් අගවිනිසුරු මුර්දු ප්‍රනාන්දුගේ නිර්දේශය ද මෙතෙක් ලැබී නැතැයි පැවසේ.
මීට පෙර පසුගිය ජනවාරි මාසයේදී ශ්‍රේෂ්ඨාධිකරණ විනිසුරු ධූර හතරක් සඳහා පුරප්පාඩු ඇතිවූ විට, ඒ සඳහා අගවිනිසුරුවරිය නිර්දේශ කල නම් වලද ජ්‍යෙෂ්ඨ විනිසුරුවරයෙකු වුවත් ලෆාර් මහතාගේ නම නොතිබූ බවද වාර්තා වේ.
ඒ නිසා ජනාධිපතිවරයාද ඔහුගේ නම ආණ්ඩුක්‍රම ව්‍යවස්ථා සභාවට යෝජනා නොකළේය.
ඒ හේතුවෙන් ලෆාර් මහතාට වඩා ජ්‍යෙෂ්ඨත්වයෙන් අඩු අභියාචනාධිකරණ විනිසුරුවරුන් වන සම්පත් විජේකෝන් සහ සම්පත් විජේරත්න යන විනිසුරුවරුද, ජ්‍යෙෂ්ඨත්වයෙන් ඉහළ සිටි සෝභිත රාජකරුණා හා මේනකා විජේසුන්දර යන විනිසුරුවරු ද අගවිනිසුරුවරියගේ නිර්දේශය මත ශ්‍රේෂ්ඨාධිකරණ විනිසුරු පත්වීම් ලදහ.