වර්තමාන මාලිමා රජය යනු කිසිදු දැක්මක් හෝ දැවැන්ත ව්යාපෘතියක් ක්රියාත්මක කිරීමට ශක්තියක් නොමැති “චූටි මිනිසුන්ගේ” ආණ්ඩුවක් බව සමගි ජන බලවේගයේ පාර්ලිමේන්තු මන්ත්රී ප්රසාද් සිරිවර්ධන මහතා පවසයි. ජනතාව විශාල බලාපොරොත්තු සහිතව බලය ලබා දුන්නද, අනුර කුමාර දිසානායක මහතා යනු තමන්ට ලැබුණු ජනාධිපති ධුරය නමැති “ලොකු පුටුවේ” අයිනක වාඩි වී සිටින, තීරණ ගැනීමට බිය “පොඩි මිනිසෙකු” බව ඔහු අවධාරණය කළේය. අන්තර්ජාල නාලිකාවක් සමඟ පැවැති සාකච්ඡාවකදී මන්ත්රීවරයා සිදුකළ මෙම ප්රකාශය මේ වන විට දේශපාලන කරළිය උණුසුම් කර තිබේ.
ලංකාවේ ඉතිහාසය දෙස බලන විට සෑම රජයක්ම රටේ ඉදිරි ගමනට බලපාන දැවැන්ත සන්ධිස්ථාන සනිටුහන් කර ඇති බව පෙන්වා දුන් සිරිවර්ධන මහතා, 70 දශකයේ සිරිමා බණ්ඩාරනායක රජය ජාතික ආර්ථිකය ශක්තිමත් කළ ආකාරයත්, 77 ජේ.ආර්. ජයවර්ධන රජය විවෘත ආර්ථිකය හඳුන්වා දී රට ලෝකයට විවෘත කළ ආකාරයත් සිහිපත් කළේය. එලෙසම 94 චන්ද්රිකා රජය විශ්වවිද්යාල පද්ධතිය පුළුල් කිරීමත්, 2004 මහින්ද රාජපක්ෂ රජය යුද්ධය අවසන් කිරීම වැනි තීරණාත්මක කාර්යයන් සිදු කළත්, වත්මන් මාලිමා රජය බලයට පත්ව වසරකට වැඩි කාලයක් ගතවී ඇතත් එවැනි කිසිදු සාධනීය හෝ දැවැන්ත වැඩක් ආරම්භ කිරීමටවත් සමත් වී නැති බව ඔහු පෙන්වා දුන්නේය.
රටක් මෙහෙයවීමට නම් ලොකු සිහින දකින ලොකු මිනිසුන් සිටිය යුතු බවත්, නමුත් අද පාලනය මෙහෙයවන්නේ එවැනි පෞරුෂයක් හෝ දැක්මක් නොමැති පිරිසක් බවත් මන්ත්රීවරයා චෝදනා කරයි. විශේෂයෙන්ම මෑතකදී හෙළි වූ රුමේනියාවේ ශ්රී ලංකා තානාපති කාර්යාලයේ සිදුවූ බව කියන දූෂණ සහ අක්රමිකතා, මෙන්ම අධ්යාපන ක්ෂේත්රය තුළ 6 වසරේ දරුවන්ට අසභ්ය අන්තර්ගතයන් සහිත මොඩියුල බෙදා හැරීම වැනි සිදුවීම් හරහා තහවුරු වන්නේ ආණ්ඩුවේ පරිපාලනමය දුර්වලතාවයයි. මාලිමාව “සිස්ටම් චේන්ජ්” ගැන කිව්වද, ප්රායෝගිකව සිදුවන්නේ පද්ධතිය තවදුරටත් කඩා වැටීම බව සිරිවර්ධන මහතා පවසයි.
ප්රසාද් සිරිවර්ධන මන්ත්රීවරයාගේ මෙම විග්රහය තුළින් පැහැදිලි වන්නේ මාලිමා රජය තුළ පවතින අත්දැකීම් රහිත බව සහ දැවැන්ත අභියෝග හමුවේ ඔවුන් පත්ව ඇති අසරණභාවයයි. දිට්වා සුළි කුණාටුව වැනි ස්වභාවික විපත්වලදී පවා ජනතාව ආරක්ෂා කර ගැනීමට අසමත් වූ රජයක්, රටේ ආර්ථිකය හෝ අනාගතය භාර ගැනීමට සුදුසු නැති බව මන්ත්රීවරයාගේ අදහසයි. කොළඹ මහ නගර සභාවේදී පවා මන්ත්රීවරුන් බිලිබා ගනිමින් බලය රැකගැනීමට දරන නින්දිත උත්සාහය හරහා “පොඩි මිනිසුන්ගේ” දේශපාලනයේ තරම මැනවින් පෙනෙන බව ඔහු වැඩිදුරටත් පැවසීය.