රජයේ විශ්ව විද්‍යාල පද්ධතිය තුළින් මානව ශාස්ත්‍ර හා සමාජ විද්‍යා උපාධි පාඨමාලාවකට සම්බන්ධ වීමට හිමි වූ වටිනා අවස්ථාව යම් හේතුවක් මත මග හැරුණු සිසුන්ට සහ රැකියාවල නියුතු වෘත්තිකයන්ට ශ්‍රී ලංකා විවෘත විශ්ව විද්‍යාලය (OUSL) විසින් අතිශයින් වැදගත් දෙවන අවස්ථාවක් ලබා දී තිබේ. මෙය, උසස් අධ්‍යාපනය ලබන සංඛ්‍යාව ඉහළ නැංවීමටත්, නම්‍යශීලී අධ්‍යාපන ක්‍රමවේද තුළින් රටේ මානව සම්පත සංවර්ධනය කිරීමටත් ශ්‍රී ලංකා විවෘත විශ්ව විද්‍යාලය දරන විශාල දායකත්වය සනාථ කරයි.
නම්‍යශීලී අධ්‍යාපනයෙන් ජාතික අවශ්‍යතාව සපුරයි
ශ්‍රී ලංකාවේ විවෘත හා දුරස්ථ අධ්‍යාපනයේ (ODL) ප්‍රමුඛයා වන ශ්‍රී ලංකා විවෘත විශ්ව විද්‍යාලය, තම ප්‍රාදේශීය මධ්‍යස්ථාන ජාලය හරහා උපාධි අපේක්ෂකයින්ට ඉතා නම්‍යශීලී අධ්‍යාපන අත්දැකීමක් ලබා දෙයි. විශේෂයෙන්ම දැනටමත් රැකියාවල නියුතු හෝ සාම්ප්‍රදායික විශ්ව විද්‍යාල අධ්‍යාපනයට පැමිණීමට නොහැකි වූවන්ට, මෙම ක්‍රමය මහත් සහනයකි. මෙහිදී ගෞරවනීය ආචාර්ය මහාචාර්යවරුන් යටතේ ගුණාත්මක අධ්‍යාපනයක් ලබමින්, රැකියාවේ දියුණුවට අවශ්‍ය උපාධිය ලබා ගැනීමට අවස්ථාව උදා වේ.
ශ්‍රී ලංකා විවෘත විශ්ව විද්‍යාලය මඟින් පිරිනමනු ලබන මෙම වසර තුනක උපාධි පාඨමාලාව, රටේ වත්මන් සමාජ, ආර්ථික හා දේශපාලන අවශ්‍යතාවන්ට සරිලන පරිදි හරවත් නව විෂය නිර්දේශයන් යටතේ සකසා තිබීම විශේෂත්වයකි.
නව ක්ෂේත්‍ර හතරක් ඔස්සේ
සිසුන්ට පහත සඳහන් වැදගත් අධ්‍යයන අංශ හරහා නව දැනුම ලබා ගැනීමට අවස්ථාව ලැබේ:
- Politics & International Studies (දේශපාලන හා ජාත්‍යන්තර අධ්‍යයන)
- Economic & Development Studies (ආර්ථික හා සංවර්ධන අධ්‍යයන)
- Society & Culture Studies (සමාජ හා සංස්කෘතික අධ්‍යයන)
- Communication Studies (සන්නිවේදන අධ්‍යයන)
මෙම විෂය ක්ෂේත්‍ර අද වන විට රටේ ආර්ථික ප්‍රතිසංස්කරණ, ප්‍රජා සංවර්ධනය සහ ජාත්‍යන්තර සබඳතා තේරුම් ගැනීම සඳහා අත්‍යාවශ්‍ය වේ. එබැවින්, මෙම උපාධිය තුළින් රටේ සංවර්ධනයට සෘජුවම දායක විය හැකි, අභියෝග භාරගත හැකි දැනුමැති මානව සම්පතක් බිහි කිරීමට අවකාශය ලැබේ.මෙම වටිනා අවස්ථාවට සම්බන්ධ වීමට බලාපොරොත්තු වන අය සඳහා, 2025 නොවැම්බර් 24, 25, 26, 27 යන දිනවලදී නාවල පිහිටි විවෘත විශ්ව විද්‍යාලීය පරිශ්‍රයට හෝ ආසන්නතම ප්‍රාදේශීය මධ්‍යස්ථානයකට පැමිණ ලියාපදිංචි වීමට හැක.
