එක්සත් ජාතික පක්ෂය (UNP) සිය ඓතිහාසික ප්‍රතිපත්ති සහ පළපුරුදු නායකත්වය තුළින් රටට විසඳුම් දෙන විකල්පය බවට පත් කිරීමේ නව වැඩසටහනක් ආරම්භ කර ඇතැයි වාර්තා වේ.
ඒ බව සනිටුහන් කරමින්, දශක ගණනාවක් පුරා එක්සත් ජාතික පක්ෂ දේශපාලනයේ මර්මස්ථානය වූ ‘සිරිකොත’ පක්ෂ මූලස්ථානය, නව මුහුණුවරකින් සහ නැවුම් දේශපාලන දැක්මකින් යුතුව ලබන දෙසැම්බර් 7 වන දින පාක්ෂික සහභාගීත්වයෙන් විවෘත කිරීමට නියමිතය. මෙම පුනරාගමනය සංකේතවත් කරන්නේ, වත්මන් NPP ආණ්ඩුවේ අසාර්ථක වූ ජනප්‍රියවාදී ප්‍රතිපත්ති වෙනුවට, තහවුරු කරන ලද ආර්ථික වර්ධනයක් සහ විශ්වසනීය රාජ්‍ය පාලනයක් කරා රට මෙහෙයවීමේ එජාපයේ අරමුණ වී තිබේ.
එක්සත් ජාතික පක්ෂය සෑම විටම දැඩි වෙළෙඳපොළ හිතකාමී ප්‍රතිපත්ති, විශාල පරිමාණයේ ආයෝජන සහ ශීඝ්‍ර ආර්ථික වර්ධනයක් සඳහා ප්‍රසිද්ධියක් උසුලයි. ඔවුන් බලයේ සිටි කාලවලදී (1977, 2001) ආයෝජන මණ්ඩලය (BOI) වැනි ප්‍රධාන ආර්ථික ආයතන පිහිටුවා ඇති අතර, එමඟින් රට ශක්තිමත් ආර්ථික වර්ධනයකට ලක්වූ අවස්ථා ඉතිහාසයේ සඳහන් වේ.
