ජාතික ජන බලවේගය (NPP) පාලනය කළ ඌවපරණගම සහ පදියතලාව යන ප්‍රාදේශීය සභා දෙකේ අයවැය අද (14) දින පරාජයට පත් වීමත් සමඟ, NPP යටතේ බලය හිමිව තිබූ ප්‍රාදේශීය සභා 55ක අයවැය මේ වන විට අසාර්ථක වී තිබේ. මෙය, විපක්ෂයේ මන්ත්‍රීවරුන් අතර ගොඩනැගෙන සමගිය හමුවේ NPP හි පාලන හැකියාවන් සහ ආණ්ඩුවේ බලය රට පුරා බිඳ වැටීමේ දැවැන්තම දේශපාලන පෙරළිය ලෙස සැලකේ.
පසුගිය දින කිහිපය තුළ NPP පාලනය කළ සොරණාතොට, කොලොන්න, දොඩංගොඩ සහ නාඋල යන සභා අයවැයෙන් පරාජයට පත් විය. මේ වන විට එම පරාජයන් සංඛ්‍යාව 55ක් දක්වා ඉහළ යාම, ආණ්ඩුවට සහ එහි ප්‍රධාන විකල්පයට එරෙහිව බිම් මට්ටමේ විරෝධය කෙතරම් ප්‍රබලදැයි කියාපායි.
පදියතලාව සහ ඌවපරණගම සභා වලදී විපක්ෂය එකට!
අද දිනයේදී පරාජයට පත් වූ සභාවන් දෙකේදී විපක්ෂයේ සියලු පක්ෂ එකට එක් වී ඡන්දය ප්‍රකාශ කිරීම කැපී පෙනේ:
1. ඌවපරණගම ප්‍රාදේශීය සභාව
- සභාපති දිනදාස රත්නායක මහතා විසින් අයවැය ඉදිරිපත් කරන ලදී.
- අයවැයට පක්ෂව NPP සභිකයින් 20 දෙනාම ඡන්දය ලබා දුන්හ.
- එහෙත්, අයවැයට විපක්ෂව එක්සත් ජාතික පක්ෂය (UNP), සමගි ජන බලවේගය (SJB), පොදුජන එක්සත් පෙරමුණ (SLPP), සර්වජන බලවේගය සහ පෙරටුගාමී පක්ෂය යන පක්ෂ සියල්ලම එකට ඡන්දය භාවිත කිරීමෙන් අයවැය පරාජයට පත් විය.
2. පදියතලාව ප්‍රාදේශීය සභාව
- සභාපති අනුර රාජපක්ෂ මහතා විසින් අයවැය ඉදිරිපත් කරන ලදී.
- ඡන්ද 08 ක් පක්ෂව සහ ඡන්ද 12 ක් විපක්ෂව ලැබීමෙන් අයවැය පරාජය විය.
- පසුගිය මැතිවරණයෙන් පසු සභාව පිහිටුවීමේදී NPP ය අනෙක් පක්ෂ සමඟ හවුල්ව 13-07 ලෙසින් බලය ගත්තද, අද පැවති විවෘත ඡන්දයේදී SJB, SLPP, සර්වජන බලය, සහ UNP යන පක්ෂවල සභිකයින් එකට විපක්ෂව ඡන්දය ප්‍රකාශ කිරීම NPP හි බිම් මට්ටමේ හවුල් පාලනයේ අස්ථාවරත්වය පෙන්නුම් කරයි.
හරීන් ප්‍රනාන්දුගේ මෙහෙයුමේ බලපෑම!
මෙම පරාජයන් සිදුව ඇත්තේ පසුගිය සඳුදා බදුල්ල දිස්ත්‍රික්කය නියෝජනය කළ හිටපු මන්ත්‍රී හරීන් ප්‍රනාන්දු මහතා එක්සත් ජාතික පක්ෂයේ (UNP) නියෝජ්‍ය මහ ලේකම් ධූරයේ නිල වශයෙන් වැඩ භාර ගෙන, වත්මන් ආණ්ඩුවට එරෙහිව පොදු විපක්ෂයක් ගොඩනැගීමේ උත්සාහය පිළිබඳව දැඩි ලෙස අවධානය යොමු වී ඇති පසුබිමකයි. ප්‍රාදේශීය සභාවලදී විවිධ පක්ෂ එකට එක්වී NPP යේ අයවැය පරාජය කිරීම, හරීන් ප්‍රනාන්දු මහතා ප්‍රකාශ කළ විපක්ෂයේ සමගි වීමේ අවශ්‍යතාවේ ප්‍රායෝගික ප්‍රතිඵලයක් ලෙස දේශපාලන විශ්ලේෂකයෝ සලකති.
මෙම අඛණ්ඩ අයවැය පරාජයන් මගින්, NPP හි පාලන හැකියාවන් සහ රටේ මූල්‍ය අර්බුදයට විසඳුම් දීමේ හැකියාව පිළිබඳව ජනතාව තුළ පවතින විශ්වාසය දැඩි ලෙස බිඳ වැටෙමින් ඇති බවට පැහැදිලි සංඥා නිකුත් කරයි.