වත්මන් ජාතික ජන බලවේගය (NPP) ආණ්ඩුවට එරෙහිව දැවැන්ත දේශපාලන ප්‍රහාරයක් දියත් කිරීම සඳහා පොදු විපක්ෂය සූදානම් වන අතර, ඒ සඳහා එක්සත් ජාතික පක්ෂයේ (UNP) ප්‍රබල භූමිකාවක් හිටපු අමාත්‍ය හරීන් ප්‍රනාන්දු මහතාට පැවරී තිබේ.
ඒ අනුව, හරීන් ප්‍රනාන්දු මහතා විසින් එක්සත් ජාතික පක්ෂයේ නව දේශපාලන බලමුළු ගැන්වීමේ නියෝජ්‍ය මහලේකම් තනතුරේ වැඩ භාරගැනීම එළඹෙන සඳුදා සිරිකොත පක්ෂ කාර්යාලයේ දී සිදු කිරීමට නියමිත බව වාර්තා වේ. මෙම නව තනතුර සමඟින්, විපක්ෂයේ සාමාජිකයෙකු ලෙස ඔහු ආණ්ඩුවට එරෙහිව ගෙන යන දේශපාලන ව්‍යාපාරය තවදුරටත් ශක්තිමත් වනු ඇතැයි අපේක්ෂා කෙරේ.
එසේම, ආණ්ඩුවට එරෙහිව පොදු විපක්ෂය විසින් එළඹෙන නොවැම්බර් මස 21 වනදා නුගේගොඩදී සංවිධානය කිරීමට නියමිත “මහා ජන හඬ” ජනරැළිය සඳහා ද ප්‍රනාන්දු මහතා සක්‍රියව සහභාගී වීමට තීරණය කර ඇත. විපක්ෂයේ ප්‍රබල හඬක් ලෙස ඔහු මෙම රැළියට එක්වීම, ආණ්ඩු විරෝධී ඒකරාශී වීමට නව ජීවයක් ලබා දෙනු ඇතැයි විශ්වාස කෙරේ.