ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතාට එරෙහිව එල්ල වන නීති උපාධිය වංචනික ලෙස ලබා ගැනීම සම්බන්ධයෙන් වූ පැරණිතම චෝදනාව අද (නොවැම්බර් 19) පාර්ලිමේන්තුව තුළ යළි උණුසුම් වීමට ලක් වූයේ, මන්ත්‍රීවරයා පාර්ලිමේන්තු කටයුතු පිළිබඳ කාරක සභාවේ සාමාජිකත්වයෙන් ඉල්ලා අස්වීමෙන් පසුවය. මෙම ඉල්ලා අස්වීම පුරප්පාඩුව පිරවීම සඳහා ඩී.වී. චානක මන්ත්‍රීවරයා පත් කිරීම වැනි පරිපාලනමය වෙනස්කම්වලට වඩා, මේ පිටුපස ඇති නීතියේ අක්‍රමිකතාව පිළිබඳ කතාව, වත්මන් ජාතික ජන බලවේගය (NPP) රජයේ තෝරාගත් යුක්තිය පිළිබඳ කතිකාවට දැඩි අභියෝගයක් එල්ල කරයි.
විමර්ශනයක් ඇත, එහෙත් වාර්තාවක් නැත!
අල්ලස, දූෂණය, නාස්තියට එරෙහි පුරවැසි බලයේ සභාපති ජාමුනි සමන්ත තුෂාර මහතාගේ පැමිණිල්ලකට අනුව, කොළඹ ප්‍රධාන මහේස්ත්‍රාත් අධිකරණය අපරාධ පරීක්ෂණ දෙපාර්තමේන්තුවට (CID) නාමල් රාජපක්ෂ මහතාගේ නීති උපාධිය වංචනික ලෙස ලබා ගැනීම සම්බන්ධයෙන් විධිමත් පරීක්ෂණයක් පවත්වන ලෙස අප්‍රේල් මාසයේදී නියෝග කර තිබේ. අධිකරණ අමාත්‍ය නීතිඥ හර්ෂණ නානායක්කාර මහතා පවා ප්‍රකාශ කළේ දූෂණයට එරෙහිව කටයුතු කිරීම සහ නීතියේ ආධිපත්‍යය ආරක්ෂා කිරීම NPP ජනවරමේ බලගතුම කරුණු දෙක බවයි.
එහෙත්, ඩී.වී. චානක මන්ත්‍රීවරයා පාර්ලිමේන්තුවේදී කරන ලද ප්‍රකාශයෙන් සහ නාමල් රාජපක්ෂ මහතාගේ ප්‍රකාශයෙන් හෙළිදරව් වූයේ, NPP ආණ්ඩුව බලයට පත්වීමෙන් පසු මෙම විමර්ශනය ආරම්භ කළද, මාස ගණනක් ගතවී ඇතත් CID විසින් අධිකරණයට කිසිදු වාර්තාවක් ඉදිරිපත් කර නොමැති බවයි. මෙය පැහැදිලිවම පෙන්වා දෙන්නේ, රජයේ ප්‍රධාන නීති අංශය වන CID, ජනතාව බලාපොරොත්තු වූ පරිදි කඩිනම් සහ විනිවිදභාවයෙන් යුත් පරීක්ෂණයක් සිදුකරනවා වෙනුවට, යම් දේශපාලන පහසුවක් මත පදනම්ව මෙම විමර්ශනය යට ගසමින් සිටින බවයි.
තොරතුරු සපයන්නා
මෙම නඩුවේ වඩාත්ම සංවේදී සහ භයානක කාරණය වන්නේ, නීති විභාගයට පෙනී සිටි අවස්ථාවේදී නාමල් රාජපක්ෂ මහතා වායුසමනය කළ තනි කාමරයක අසුන් ගෙන සිටීම පිළිබඳව මුලින්ම හෙළි කළ තරුණයාට අත්වූ ඉරණමයි. එවකට රාජ්‍ය යාන්ත්‍රණය විසින් ඔහුගේ පැමිණිලි කිසිවක් සටහන් කර නොගෙන ප්‍රතික්ෂේප කර ඇත. ඉන් නොනැවතී එම තරුණයා පැහැර ගැනීම්වලට පවා ලක්වී ඇති අතර, අවසානයේ ජීවිත ආරක්ෂාව පතා රටින් පිටවී ඇත.
මෙම සිද්ධිය සලකා බලන විට, NPP රජයේ යුක්තිය පිළිබඳ වගකීම වන්නේ නාමල් රාජපක්ෂ මහතාගේ දේශපාලන විවේචනවලට පිළිතුරු දීම නොව, විධිමත් පරීක්ෂණයක් සඳහා සාක්ෂි ලබා දීමට සූදානමින් සිටිනා ජීවිත අවදානමක සිටින තොරතුරු සපයන්නාට ආරක්ෂාව ලබා දී, ඔහුගේ සාක්ෂි ලබා ගැනීමයි. මාස ගණනක් තිස්සේ විමර්ශන වාර්තාවක් අධිකරණයට ඉදිරිපත් නොකිරීම තුළින්, වත්මන් රජය පැරණි පාලන තන්ත්‍රය මෙන් දේශපාලන බලවතුන්ගේ අධ්‍යාපනික වංචා පවා ආරක්ෂා කරමින් සිටින බවට බරපතළ සැකයක් මතුවෙයි.
දේශපාලන මෙවලමක් බවට පත් වූ දූෂණ විරෝධය
රාජපක්ෂ මහතා පාර්ලිමේන්තු කමිටුවකින් ඉල්ලා අස්වීම වැනි සුළු දේශපාලන වෙනස්කම්වලට වඩා, මෙම නීති වංචා චෝදනාවට අදාළව CID වාර්තාව ප්‍රමාද කිරීමේ දේශපාලන ප්‍රතිවිපාක අති විශාලය. NPP රජය, තෝරාගත් යුක්තිය ක්‍රියාත්මක කරමින් සිටින බවට මෙමගින් පැහැදිලි සංඥාවක් ලබා දෙයි. ජනතාව දුන් ජනවරම මත පදනම්ව නීති විද්‍යාලයේ විශ්වසනීයත්වය පවා පරදුවට තබා සිදු වූ මෙම වංචාව සම්බන්ධයෙන් විධිමත් පරීක්ෂණයක් කඩිනමින් සිදු නොකරන්නේ නම්, NPP හි සමස්ත දූෂණ විරෝධී ව්‍යාපාරය දේශපාලන වාසි සඳහා පමණක් යොදාගන්නා තවත් එක් රංගනයක් ලෙස ඉතිහාසයේ සටහන් වනු නොඅනුමානය.