විපක්ෂයේ ප්‍රධාන ජන රැළියක් ලබන 21 වැනිදා නුගේගොඩදී පැවැත්වීමට නියමිතව තිබෙන මොහොතේ, ශ්‍රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතා ප්‍රකාශ කළේ, “21 වැනිදා විපක්ෂයේ තරම ආණ්ඩුවට පෙන්වීමට සූදානම්” බවයි.
මේ අතර, විපක්ෂයේ ක්‍රියාකාරිත්වය සම්බන්ධයෙන් අදහස් දැක්වූ නාමල් රාජපක්ෂ මහතා අවධාරණය කළේ, රටේ ජනතාව වෙනුවෙන් පෙනී සිටීමට, ප්‍රජාතන්ත්‍රවාදය වෙනුවෙන් කතා කිරීමට සහ ජනතා ප්‍රශ්න වෙනුවෙන් හඬ නැගීමට විපක්ෂ නායක තනතුර වැනි තානාන්තර අවශ්‍ය නොවන බවයි. 2015 දී යහපාලන ආණ්ඩුව සමයේ විපක්ෂ නායකයා ආණ්ඩුව සමග සිටියද, ඒකාබද්ධ විපක්ෂය ලෙස විපක්ෂයේ රාජකාරිය නිසි ලෙස ඉටු කළ බව සිහිපත් කළ ඔහු, තම මතවාදය විශ්වාස කරන පක්ෂ කිහිපයක් එක්ව විපක්ෂයේ බලවේගයක් නිර්මාණය කරමින් සිටින බව පැවසීය. ඇතැමුන් විපක්ෂයේ සිටියත් තමන් විශ්වාස කරන මතවාදය දරන්නට නොහැකි බව ද ඔහු තවදුරටත් පැහැදිලි කළේය.
තවද විපක්ෂයේ බලවේග එක්වීමේ සූදානම සම්බන්ධයෙන් එක්සත් ජාතික පක්ෂයේ උප නායක, හිටපු අමාත්‍ය අකිල විරාජ් කාරියවසම් මහතා ප්‍රකාශ කළේ, සමගි ජන බලවේගය (සජබය) සහ එක්සත් ජාතික පක්ෂය (එජාපය) යළි එක්වීමේ හැකියාව පිළිබඳ සාකච්ඡා මට්ටමින් කටයුතු කරමින් සිටින බවත්, එය රටට සේවයක් වනු ඇති බවත්ය. එජාපයේ මෙම අදහසට අනුව, සියලු පාර්ශ්වයන්ගේ එකතුවීම යහපත් බව සජබය පාර්ශ්වයෙන්ද අදහස් පළ වී තිබේ. එසේම, විපක්ෂ පක්ෂ ගණනාවක් ලබන 21 වැනි දින රැළියට එක්වීමට සූදානමින් සිටින අතර, නායකත්ව ප්‍රශ්නයක් පිළිබඳව තීරණය කිරීමට තවත් කල් ඇති බවද එම පාර්ශ්වය වැඩිදුරටත් සඳහන් කළේය.
එහෙත්, එම රැළියට පෙර රජය තමන්ව අත්අඩංගුවට ගැනීමට සූදානම් වන බවට පිවිතුරු හෙළ උරුමයේ නායක පාර්ලිමේන්තු මන්ත්‍රී උදය ගම්මන්පිල මහතා දැඩි චෝදනාවක් එල්ල කර තිබේ. කොළඹදී පැවති මාධ්‍ය හමුවකදී අදහස් දැක්වූ ගම්මන්පිල මහතා, හිටපු නාවික හමුදාපති නිශාන්ත උළුගේතැන්න මහතාගේ අත්අඩංගුවට ගැනීම සම්බන්ධයෙන් තමන් කළ ප්‍රකාශයක් මුල් කරගෙන අපරාධ පරීක්ෂණ දෙපාර්තමේන්තුව විසින් ICCPR පනත අවභාවිත කරමින් තමන්ව ඇප රහිතව රක්ෂිත බන්ධනාගාර ගත කිරීමට රජය සූදානම් බවට චෝදනා කළේය. ඒ සම්බන්ධයෙන් තමන් අභියාචනාධිකරණයෙන් රිට් පෙත්සමක් මගින් සහනයක් පතා ඇති බවද ඔහු සඳහන් කළේය.