ඉන්දීය සහ දේශීය මාධ්‍ය ප්‍රවීණයන් රැසකගේ සහභාගීත්වයෙන් ශ්‍රී ලංකාවේ ප්‍රථම මාධ්‍ය උළෙල අද සහ හෙට (26) කොළඹ ටාජ් සමුද්‍රා හෝටලයේදී පැවැත්වේ.
මහජන මාධ්‍ය සහ සෞඛ්‍ය අමාත්‍ය සහ ප්‍රධාන රජයේ සංවිධායක වෛද්‍ය නලින්ද ජයතිස්ස මහතා මෙම උළෙලේ ප්‍රධාන ආරාධිත අමුත්තා ලෙස සහභාගී වන අතර වැඩබලන ඉන්දීය මහ කොමසාරිස් වෛද්‍ය සත්‍යංජල් පාණ්ඩේ මහතා ගරු ආරාධිත අමුත්තා ලෙස සහභාගී වේ.
උළෙලේ සමාරම්භක සැසිය අද පස්වරු 5 ට ආරම්භ වන අතර සෙනසුරාදා උදෑසන 9 සිට පූර්ණ දින සැසි පැවැත්වේ.
“දකුණු ආසියාවේ මාධ්‍ය සඳහා අභියෝග සහ අවස්ථා” පිළිබඳ ප්‍රධාන දේශනයක් සමඟ සෙනසුරාදා සැසිවාර ආරම්භ වන අතර එය Frist Post කතුවරයා වන පල්කි ෂර්මා මහත්මිය විසින් පවත්වනු ලැබේ.
“AI සහ ජනමාධ්‍ය: බලපෑම් සහගත ජනමාධ්‍ය සඳහා තාක්‍ෂණය ඒකාබද්ධ කිරීම”, “මොබයිල් ජර්නලිස්ම් මාස්ටර්ක්ලාස්”, “දත්ත කතන්දර වැඩමුළුව”, “ව්‍යාජ තොරතුරු සහ අන්තර්ගතයන් හැසිරවීමේ යුගයේ මාධ්‍ය විශ්වාසය ගොඩනැගීම”, “සමාජ මාධ්‍ය අන්තර්ගත උපාය මාර්ග” සහ “Podcasting and Audio Journalism” යන මාතෘකා යටතේ පැනල් සාකච්ඡා සහ විවේක සැසි පැවැත්වේ.
උළෙල අවසන් වන්නේ “ශ්‍රී ලංකා මාධ්‍යයේ අනාගතය: බෙදාගත් අවස්ථා සහ මුදල් ඉපයීම” පිළිබඳ සැසියකින් සහ පැනල් සාකච්ඡාවකින් පසුවය.
