පාස්කු ප්‍රහාරය සම්බන්ධයෙන් වගකිව යුතු පිරිසක් හෙළි කරන බවට ජනාධිපති අනුර දිසානායක මහතා ප්‍රකාශ කර ඇත. එළඹෙන අප්‍රේල් 21 වන විට පාස්කු ප්‍රහාරයට වසර 6ක් ගත වන අතර, අපරාධ පරීක්ෂණ දෙපාර්තමේන්තුව විසින් එදිනට පෙර සැකකරුවන් පිරිසක් හෙළිදරව් කිරීමට උත්සාහ දරන බව ජනාධිපතිවරයා සඳහන් කළේය.
මේ පිළිබඳව අදහස් දක්වමින් කතෝලික සභාවේ මාධ්‍ය ප්‍රකාශක සිරිල් ගාමිණී පියතුමා පැවසුවේ අප්‍රේල් 21 වනදා තෙක් ඕනෑකමින් බලා සිටින බවත්, නව රජයේ ප්‍රකාශය පිළිබඳව දැඩි විශ්වාසයක් තබා සිටින බවත්ය. කාදිනල් හිමිපාණන් මීට පෙර ප්‍රකාශ කර තිබුණේ පාස්කු ප්‍රහාරය සම්බන්ධයෙන් නව රජයෙන් සාධාරණයක් ඉටු නොවන බවත්, එසේ වුවහොත් නව රජයට එරෙහිව පාරට බැසීමට සිදු වනු ඇති බවත්ය.
මේ අතර, ඇමරිකානු FBI ආයතනය විසින් සහරාන් හෂීම් පාස්කු ප්‍රහාරයේ මහ මොළකරු බවට තහවුරු කර ඇති අතර, හිටපු මහ ඇමති පිල්ලයාන් විසින් සහරාන් විසින් පුහුණු කළ කාන්තාවන් පිළිබඳ තොරතුරු හෙළිදරව් කර තිබේ.
මෙම කාන්තාවන් පුහුණු කිරීම සඳහා සහරාන් විසින් වෙනම පුහුණු පාඨමාලා පවත්වන ලද අතර, 2018 වසරේ දෙසැම්බර් මාසයේ කාත්තන්කුඩි ප්‍රදේශයේ පවත්වන ලද එක් පාඨමාලාවකට කාන්තාවන් 15 දෙනෙකු පමණ සහභාගී වී තිබුණි.
2019 පාස්කු ප්‍රහාරයෙන් පසු සයින්දමරුදු ප්‍රදේශයේ සිදුවූ බෝම්බ ප්‍රහාරයෙන් මෙම කාන්තාවන් 15 දෙනාගෙන් පස් දෙනෙකු මිය ගොස් ඇති අතර තිදෙනෙකු අත්අඩංගුවට ගෙන තිබේ. ඉතිරි කාන්තාවන් හත් දෙනා ත්‍රස්ත විමර්ශන ඒකකය විසින් රඳවාගෙන ප්‍රශ්න කරන බව පොලිස් මාධ්‍ය ප්‍රකාශක අජිත් රෝහණ පවසා තිබේ.
මේ අතර, හිටපු ජනාධිපති රනිල් වික්‍රමසිංහ මහතා විසින් රක්ෂිත බන්ධනාගාරගත කර සිටින හිටපු මහ ඇමති පිල්ලයාන් සමඟ දුරකථනයෙන් කතා කිරීමට අවසර ඉල්ලා සිටීම සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර ඇත.
නමුත් රක්ෂිත බන්ධනාගාරයේ සිටින සැකකරුවෙකු සමග දුරකථනයෙන් කතා කිරීමට අවසර ලබා දිය නොහැකි බව අදාළ නිලධාරියා ප්‍රතික්ෂේප කර ඇත.
පොලිස් නිලධාරියාගෙන් ප්‍රශ්න කිරීමෙන් අනතුරුව හිටපු ජනාධිපතිවරයාගෙන් ප්‍රශ්න කිරීමට පියවර ගන්නා බව වාර්තා වේ.