පොලිස්පති දේශබන්දු තෙන්නකෝන් මහතා ධුරයෙන් පහ කිරීම සඳහා වන යෝජනාව ගෙන ඒමේ ක්‍රියාවලිය පාර්ලිමේන්තුවේ ස්ථාවර නියෝග වලට පටහැනි බවට චෝදනා කරමින් විපක්ෂයේ දේශපාලන පක්ෂ කිහිපයක නායකයින් පාර්ලිමේන්තු කටයුතු පිළිබඳ කාරක සභාවේදී විරෝධය පළ කර ඇත.
සමගි ජන බලවේගය, ශ්‍රී ලංකා පොදුජන පෙරමුණ සහ නව ප්‍රජාතන්ත්‍රවාදී පෙරමුණ යන පක්ෂ තුන විරෝධය පළ කළ පක්ෂ අතර වේ.
සමගි ජන බලවේගයේ මහ ලේකම් රංජිත් මද්දුම බණ්ඩාර මහතා පවසා ඇත්තේ පොලිස්පතිවරයාට එරෙහිව මෙවැනි යෝජනාවක් ගෙන ඒමට ඔවුන් විරුද්ධ නොවන නමුත්, එය ස්ථාවර නියෝග වලට පටහැනි ආකාරයෙන් ඉදිරිපත් කිරීම හේතුවෙන් ඊට විරුද්ධ වන බවයි.
අධිකරණය හමුවේ විභාග වන හෝ විනිශ්චයට භාජනය වී ඇති කරුණු පාර්ලිමේන්තුවේ විවාද කළ නොහැකි බව පාර්ලිමේන්තු ස්ථාවර නියෝග 91 ඊ යටතේ පැහැදිලිව දක්වා ඇති බවට එම පක්ෂ නායකයින් පෙන්වා දී ඇත.
මෙම විරෝධතා පාර්ලිමේන්තු කටයුතු පිළිබඳ කාරක සභා රැස්වීමේ වාර්තාවල සටහන් කර ඇත.
රජයේ ප්‍රකාශකයෙකු පවසා ඇත්තේ අධිකරණය හමුවේ විභාග වන හෝ විනිශ්චයට භාජනය වූ කරුණක් පිළිබඳව පාර්ලිමේන්තුවේ විවාද කළ නොහැකි බව ස්ථාවර නියෝගවල දැක්වෙන නමුත්, කතානායකවරයාගේ අභිමතය පරිදි ඕනෑම යෝජනාවක් විවාදයට ගත හැකි බවට සඳහන් වගන්තියක් ද ස්ථාවර නියෝගවල තිබෙන බවයි.
පොලිස්පතිවරයාට එරෙහි චෝදනා විභාග කිරීම සඳහා කමිටුවක් පත් කිරීමේ යෝජනාව ලබන 8 වන දින පාර්ලිමේන්තුවට ඉදිරිපත් කිරීමට නියමිතය.
පොලිස්පති ධුරයෙන් තෙන්නකෝන් මහතාව ඉවත් කිරීමේ යෝජනාව පසුගිය දිනෙක ජාතික ජන බලවේගයේ මන්ත්‍රීවරුන් පිරිසක් විසින් කථානායක වෛද්‍ය ජගත් වික්‍රමරත්න මහතා වෙත භාර දෙන ලදී.