හයවන බිම්ස්ටෙක් සමුළුවට සහභාගී වීම සඳහා අග්‍රාමාත්‍ය හරිනි අමරසූරිය තායිලන්තයේ සංචාරයක නිරත වන බවට වාර්තා වේ. සාමාජික රටවල නායකයින්ගේ සහභාගීත්වයෙන් අප්‍රේල් 3 සහ 4 දිනවල බැංකොක් නුවර මෙම සමුළුව පැවැත්වේ.
මෙය අගමැතිනිය එම තනතුරට පත් වීමෙන් පසු ඇයගේ පළමු විදේශ සංචාරය වන අතර, විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර ද ඇය සමඟ එක් වනු ඇත.
මේ අතර, ඉන්දීය අග්‍රාමාත්‍ය නරේන්ද්‍ර මෝදි අප්‍රේල් 4 වන දින ශ්‍රී ලංකාවේ තෙදින නිල සංචාරයක් සඳහා පැමිණීමට නියමිතය.
කෙසේ නමුත් තායිලන්තයේ සංචාරයට යාමට පෙර අග්‍රාමාත්‍ය ආචාර්ය හරිනි අමරසූරිය මෙනවිය ‘යුනෙස්කෝ’හි ඉහළ පෙළේ සමුළුවකට සහභාගී වීම සඳහා ප්‍රංශය බලා ඊයේ (01) පිටත්ව ගියාය.
අග්‍රාමාත්‍යවරිය ‘යුනෙස්කෝ‘ මූලස්ථානයේදී එහි අධ්‍යක්ෂ ජනරාල් ඕඩි්‍ර අසූලේ මහත්මියගේ සහභාගීත්වයෙන් පැවැත්වෙන ශ්‍රී ලංකාවේ අනුරාධපුර පූජනීය නගරයේ ලෝක උරුමය ආරක්ෂා කිරීම සඳහා ඒකාබද්ධ හා තිරසාර ප්‍රවේශයක් සහ ඒ ආශ්‍රිත ජීවන උරුමය පිළිබඳ ජාත්‍යන්තර විශේෂඥ සමුළුවේ සැසිවාරයකට අද සහභාගී වීමට නියමිතය.
යුනෙස්කෝව ශ්‍රී ලංකාව සමඟ හවුල්කාරිත්වයෙන් සංවිධානය කරන මෙම සමුළුව, අතිවිශාල සංස්කෘතික හා ඓතිහාසික වැදගත්කමක් ඇති ‘යුනෙස්කෝ’ ලෝක උරුම අඩවියක් වන අනුරාධපුරය සංරක්ෂණය කිරීමට තිරසාර උපාය මාර්ග සාකච්ඡා කිරීම සඳහා ප්‍රමුඛ ජාත්‍යන්තර විශේෂඥයන් එක්රැස් වී පවත්වයි.
සමුළුවට සමගාමීව, ද්විපාර්ශ්වික සහයෝගීතාව සහ අන්‍යෝන්‍ය වශයෙන් උනන්දුවක් දක්වන ක්ෂේත්‍ර පිළිබඳ සාකච්ඡා කිරීම සඳහා අග්‍රාමාත්‍යවරිය ප්‍රංශ රජයේ ජ්‍යෙෂ්ඨ නියෝජිතයින් හමුවීමට ද නියමිතය.
අග්‍රාමාත්‍යවරිය සමග ශ්‍රී ලාංකික දූත පිරිසට බුද්ධශාසන, ආගමික හා සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතා ඇතුළු නිලධාරීන් පිරිසක් ද ඇතුළත් වෙති.