වැලිගම ඩබ්ලිව් 15 වෙඩි තැබීමේ සිද්ධියට අදාළ තොරතුරු සම්බන්ධයෙන් ප්‍රශ්න කිරීම සඳහා හිටපු කැබිනට් අමාත්‍යවරයෙක් ලබන සඳුදා (31) අපරාධ පරීක්ෂණ දෙපාර්තමේන්තුව වෙත කැඳවා තිබේ.
දැනට මේ සිද්ධිය සම්බන්ධයෙන් හිටපු පොලිස්පති දේශබන්දු තෙන්නකෝන් මහතා ඇතුළු පිරිසක් අත්අඩංගුවට ගත් අතර දේශබන්දු තෙන්නකෝන් මහතා හැර සෙසු සැකකරුවන්ට ඇප ලබා දී තිබිණි.
කෙසේ වෙතත් මෙම සිදුවීම සම්බන්ධයෙන් හිටපු අමාත්‍යවරයා තොරතුරු දන්නා බවට ඇතිවූ සැකය මත මෙලෙස ප්‍රශ්න කිරීමට නියමිතව ඇතැයි පොලිස් ආරංචි මාර්ග සඳහන් කරයි.
එසේම පොලිස්පති දේශබන්දු තෙන්නකෝන් මහතාට මුලින් එල්ල කර තිබූ චෝදනා විසිහත පසුව විසිතුන දක්වා අඩුකර ඇත.
චෝදනා 27 ක් තිබු එම යෝජනාව මුලින්ම මන්ත්‍රී අත්සන් 115 ක් සහිතව කතානායකවරයාට භාර දී තිබිණි. එහෙත් පසුව චෝදනා අඩු කිරීමට හේතු වී ඇත්තේ මුල් යෝජනාවේ එකම චෝදනාව ස්ථාන කිහිපයක විවිධ ආකාරයට සඳහන් වීමය.
මුලින් මන්ත්‍රීන් අත්සන් කළ යෝජනාවේ චෝදනා 27 ක් ඔහුට එල්ල කර තිබිණි. එහෙත් පාර්ලිමේන්තුව විසින් නිල වශයෙන් ප්‍රකාශයට පත් කරන ලද පරිපූරක යෝජනාවේ අඩංගු වන්නේ චෝදනා 23 ක් පමණි.