ඉන්දීය අග්‍රාමාත්‍ය නරේන්ද්‍ර මෝදි මහතාගේ ශ්‍රී ලංකා සංචාරය අතරතුර, ඉන්දියාව සහ ශ්‍රී ලංකාව අතර ආරක්ෂක ගිවිසුමක් අත්සන් කිරීමට නියමිත බව ඉන්දීය මාධ්‍ය වාර්තා කර තිබේ.
1980 දශකයේ ඉන්දීය සාම සාධක හමුදා ශ්‍රී ලංකාවේ මැදිහත් වීමෙන් පසු දෙරට අතර ඇති වූ ආරක්ෂක සබඳතා යළි ස්ථාපිත කරමින් මෙම ආරක්ෂක සහයෝගීතා ගිවිසුම අත්සන් තැබෙනු ඇති බව හින්දුස්ථාන් ටයිම්ස් වාර්තාවේ සඳහන් වේ.
මෙම ගිවිසුම යටතේ දෙරට අතර සියුම් ආරක්ෂක තොරතුරු හුවමාරු කර ගනු ඇති අතර ඉන්දීය සාගර කලාපයේ ආරක්ෂාව තර කිරීමට ද කටයුතු කරනු ඇත.
දෙරට අතර භෞතික, බලශක්ති සහ ඩිජිටල් සම්බන්ධතා තවදුරටත් ශක්තිමත් කිරීම කෙරෙහි ද මෙම සංචාරයේදී අවධානය යොමු වනු ඇත.