එක්සත් කම්කරු සම්මේලනය ඇතුළු සංවිධාන රැසක් ජනාධිපති අනුර කුමාර දිසානායක මහතා වෙත ඒකාබද්ධ ලිපියක් යොමු කරමින් ජනාධිපතිවරයාගේ ආර්ථික කටයුතු උපදේශක ධූරයෙන් දුමින්ද හුලංගමුව මහතා ඉවත් කරන ලෙස ඉල්ලා ඇත.
ශ්‍රී ලංකා රක්ෂණ සංස්ථාව පෞද්ගලීකරණය කිරීමේදී එහි වටිනාකම අඩුවෙන් තක්සේරු කිරීම සම්බන්ධයෙන් වැරදිකරු වූ “අර්නස්ට් ඇන්ඩ් යංග්” විගණන සමාගමේ මෙරට කළමනාකාර හවුල්කරු ලෙස කටයුතු කරන අතරම ජනාධිපති උපදේශක තනතුර දරමින් රාජ්‍ය ප්‍රතිපත්ති සම්බන්ධයෙන් බලපෑම් කළ හැකි බරපතළ ගණයේ ලැදියාවන් අතර ගැටුමක් නිර්මාණය වී ඇති බව පවසමින් එම සංවිධාන මෙම ඉල්ලීම සිදුකර තිබේ.
මේ අතර, හුලංගමුව මහතා මුදල් අමාත්‍යාංශයේ ලේකම් ධූරයට පත් කිරීමට නියමිත බවට වාර්තා පළ වන බවත්, එසේ ඔහු එම ධූරයට පත් වුවහොත් රාජ්‍ය අංශය විසින් පෞද්ගලික අංශය කෙරෙහි සිදුකරන අධීක්ෂණය ඉවත් වී ශ්‍රී ලංකාවේ මහජනතාවට වඩා වැඩි වාසි පෞද්ගලික අංශය වෙත ලබා දීමට හේතු වන බවත් එම සංවිධාන පවසයි.
මේ අතර 2022 වසරේදී රුපියල් බිලියන 904ක් වූ පෞද්ගලික අංශයේ හිඟ බදු ප්‍රමාණය 2023 වසරේදී රුපියල් බිලියන 1,066 දක්වා ඉහළ ගොස් ඇති බව විගණකාධිපතිවරයා හෙළිදරව් කර ඇති අතර, එම වසරවල සුරාබදු හා දුම්කොළ යන අංශවල හිඟ බදු ප්‍රමාණය පිළිවෙලින් රුපියල් බිලියන 5.56 සිට රුපියල් බිලියන 7.27 දක්වා ඉහළ ගොස් ඇති බව ද එම ලිපියේ දැක්වේ.
2023 වාර්ෂික වාර්තාවට අනුව 2023 දෙසැම්බර් 31 වන විට වැට් බදු හිඟ මුදල් සහ පනවන ලද දඩ මුදල් ප්‍රමාණය රුපියල් බිලියන 455ක් වූ බවත්, අඩු ආදායම්ලාභී ජනතාව අත්‍යවශ්‍ය ද්‍රව්‍ය පරිභෝජනය පවා අත්හැර දමා ඇති තත්ත්වයක් තුළ පෞද්ගලික අංශය එම ජනතාව විසින් දරන වැට් බදු විශාල ප්‍රමාණයක් නීති විරෝධී ලෙස තබා ගෙන ඇති බවටත් එම ලිපියේ චෝදනා කර ඇත.
එහෙත් හුලංගමුව මහතා සභාපතිත්වය දරන ශ්‍රී ලංකා වාණිජ මණ්ඩලය වසර ගණනාවක් තිස්සේ පෙනී සිට ඇත්තේ බදු වංචාවල නියැලී සිටින පෞද්ගලික අංශයේ අයිතීන් වෙනුවෙන් බව එම ලිපියේ සඳහන් වේ.
[මව්බිම පුවත් වාර්තාවක් ඇසුරිනි]