ඉන්දීය අග්‍රාමාත්‍ය නරේන්ද්‍ර මෝදි අප්‍රේල් 4 සිට 6 දක්වා ශ්‍රී ලංකාවේ රාජ්‍ය සංචාරයක නිරත වන බව ඉන්දීය විදේශ කටයුතු අමාත්‍යාංශය නිවේදනය කර තිබේ.
මෙම සංචාරය අතරතුර, ජනාධිපති අනුර කුමාර දිසානායක සහ අග්‍රාමාත්‍ය ආචාර්ය හරිනි අමරසූරිය සමඟ ද්විපාර්ශ්වික සාකච්ඡා පැවැත්වීමට අගමැති මෝදි සැලසුම් කර ඇත.
මීට අමතරව, ඉන්දීය රජයේ සහාය ඇතිව දියත් කරන ලද ව්‍යාපෘති කිහිපයක් විවෘත කිරීම සහ අනුරාධපුරයේ ජය ශ්‍රී මහා බෝධීන් වහන්සේ වැඳ පුදා ගැනීම ඔහුගේ න්‍යාය පත්‍රයේ ඇතුළත් වේ.
මෙම සංචාරය අතරතුරදී දෙරට අතර අත්සන් කරන ලද අවබෝධතා ගිවිසුම් කිහිපයක් හුවමාරු කර ගැනීමට ද නියමිතය.
අග්‍රාමාත්‍ය මෝදි සමඟ ඉන්දීය විදේශ අමාත්‍යවරයා, ජාතික ආරක්ෂක උපදේශක, විදේශ ලේකම් සහ ඉන්දීය රජයේ අනෙකුත් ජ්‍යෙෂ්ඨ නිලධාරීන් ශ්‍රී ලංකාවට පැමිණෙනු ඇත.
ශ්‍රී ලංකා රජය විසින් මහනුවර ප්‍රදේශයේ සංචාරය කිරීම සඳහා ඉන්දීය අග්‍රාමාත්‍යවරයාගෙන් ඉල්ලීමක් කර තිබුන ද එය මෙම සංචාරය සඳහා ඉන්දීය විදේශ කටයුතු අමාත්‍යාංශය විසින් ඇතුලත් කර නොමැති බව ද වාර්තා වේ.