සමූපකාර තොග වෙළෙඳ සංස්ථාව (සතොස) ඈවර කිරීමේ පූර්ව අමාත්‍ය මණ්ඩල තීරණය අවලංගු කර එම සංස්ථාවේ ව්‍යාපාරික කටයුතු යළි ඇරඹීමට කැබිනට් අනුමැතිය ලැබී ඇති බව වාර්තා වේ.
1949 අංක 47 දරන සමුපකාර තොග වෙළෙඳ සංස්ථා පනත පරිච්ඡින්න කර එම ආයතනය ඇවර කිරීමට එවකට අමාත්‍ය මණ්ඩලය විසින් 2024.09.02 වන දා පැවති අමාත්‍ය මණ්ඩල රැස්වීමේදී තීරණය කර ඇත.
නමුත් ‘පොහොසත් රටක් – ලස්සන ජීවිතයක්’ ප්‍රතිපත්ති රාමුවට අනුගතව වෙළෙඳපොළ තරගකාරීත්වය ප්‍රවර්ධනය කිරීම මගින් මහජනතාව වෙත ගුණාත්මක භාණ්ඩ හා සේවා සාධාරණ මිල ගණන් යටතේ අඛණ්ඩව සැපයීම සහතික කිරීමේ අරමුණින් වෙළෙඳපොළ මෙහෙයුම් තුළ රජයේ කාර්යභාරය ක්‍රියාත්මක කිරීම සඳහා සමුපකාර තොග වෙළෙඳ සංස්ථාවට තීරණාත්මක කාර්යභාරයක් ඉටු කිරීමට හැකියාව පවතින බව රජය පැවසීය.
වෙළෙඳ, වාණිජ, ආහාර සුරක්ෂිකා සහ සමූපකාර සංවර්ධන අමාත්‍ය වසන්ත සමරසිංහ ඉදිරිපත් කළ යෝජනාව අමාත්‍ය මණ්ඩලය විසින් අනුමත කර ඇත.
මේ අතර ජනාධිපති අනුර කුමාර දිසානායකගේ උපදේශකයෙකු වශයෙන් කටයුතු කරන දුමින්ද හුලංගමුවට සම්බන්ධයක් ඇති අර්නස්ට් ඇන්ඩ් යංග් සමාගමට සතොස ආයතනයේ ටෙන්ඩරයක් ලබාදී ඇතැයි සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් චෝදනා කරයි.
මාර්තු 19 වැනිදා පාර්ලිමේන්තුවේ පැවති වෙළඳ අමාත්‍යාංශය පිළිබඳ අයවැය කාරක සභා විවාදයේදී ඔහු මෙම චෝදනාව එල්ල කළේය.
ඒ සම්බන්ධ විස්තර පැහැදිලි කරමින් මුජිබර් රහුමාන් මන්ත්‍රීවරයා පැවසුවේ සතොස ආයතනයේ පද්ධති විගණනයක් (සිස්ටම් ඔඩිට්) සඳහා ටෙන්ඩර් කැඳවීමක් සිදුකර තිබූ බවත්, එහිදී ඒ සඳහා වෙනත් සමාගමක් සුදුසුකම් ලබා සිටි බවත්ය.
එහෙත් එම ටෙන්ඩරයට අදාල ලිපිගොනු අස්ථානගතවී යැයි පවසමින් එම ටෙන්ඩරය අවලංගු කර ඒ සඳහා යළි ටෙන්ඩරයක් කැඳවා ඒ සඳහා අර්නස්ට් ඇන්ඩ් යංග් සමාගම තෝරාගෙන ඇති බවයි.
පළමු ටෙන්ඩරය අවලංගු කළේ ජනාධිපති උපදේශකට සම්බන්ධ සමාගමට එම ටෙන්ඩරය නොලැබුන නිසාදැයි ප්‍රශ්න කළ මුජිබර් රහුමාන් මන්ත්‍රීවරයා එම අස්ථානගතවී ඇති ලිපිගොනුව සෙවීම සඳහා පරීක්ෂණයක් සිදුකරන ලෙස වෙළඳ ඇමති වසන්ත සමරසිංහගෙන් ඉල්ලීමක් කළේය.
ඒ සඳහා පිළිතුරු ලබාදෙමින් වසන්ත සමරසිංහ ඇමතිවරයා එදින පාර්ලිමේන්තුවේදී ප්‍රකාශ කළේ එම සමාගම එම ටෙන්ඩරය ලබාගෙන ඇත්තේ නිසි පටිපාටිය යටතේ බවත්, හිතවතුන්ට හා යහළුවන්ට ඔවුන් ටෙන්ඩර් ලබාදෙන්නේ නැති බවත්ය.
දුමින්ද හුලංගමුව මහතා ජනාධිපති අනුර කුමාර දිසානායකගේ ජ්‍යෙෂ්ධ උපදේශකයෙකු වශයෙන් කටයුතු කරන අතර ඔහු අර්නස්ට් ඇන්ඩ් යංග් සමාගමේ ශ්‍රී ලංකාවේ හා මාලදිවයිනේ කළමනාකරණ හවුල්කරු වශයෙන් කටයුතු කරයි.