ශ්‍රී ලංකාවේ සිවිල් යුද්ධය අතරතුර සිදු වූ බරපතල මානව හිමිකම් උල්ලංඝනය කිරීම් සම්බන්ධයෙන් වගකිව යුතු පුද්ගලයින් හතර දෙනෙකුට එක්සත් රාජධානිය විසින් සම්බාධක පනවා ඇත.
මෙම සම්බාධකවලට යටත් වන පුද්ගලයින් අතරට හිටපු යුද හමුදාපතිවරුන් වන ජෙනරාල් ශවේන්ද්‍ර සිල්වා සහ ලුතිනන් ජෙනරාල් ජගත් ජයසූරිය මෙන්ම හිටපු නාවික හමුදාපති අද්මිරාල් ඔෆ් ද ෆ්ලීට් වසන්ත කරන්නාගොඩ ද ඇතුළත් වේ. තවද, එල්ටීටීඊ සංවිධානයේ නැගෙනහිර සන්නද්ධ අංශ නායකයා ලෙස කටයුතු කළ විනයාගමූර්ති මුරලිදරන් හෙවත් කරුණා අම්මාන් ද මෙම ලැයිස්තුවට ඇතුළත් ය.
මෙම පනවන ලද සම්බාධක අනුව, මෙම පුද්ගලයින්ට එක්සත් රාජධානියට ඇතුළුවීම තහනම් වන අතර එරට තුළ ඔවුන් සතු කිසියම් වත්කම් තිබේ නම් ඒවා රාජසන්තක කරනු ලැබේ.