පාර්ලිමේන්තු ආරංචි මාර්ග සඳහන් කළේ, ජනාධිපති අනුර කුමාර දිසානායක මහතාට හිටපු මන්ත්‍රීවරයෙකු ලෙස ලැබෙමින් තිබූ විශ්‍රාම වැටුප ලබන මසයේ සිට අත්හිටුවන බවයි. ඒ සඳහා පාර්ලිමේන්තුවේ මූල්‍ය අධ්‍යක්ෂවරයාට දැනුම් දී ඇති බවද එම ආරංචි මාර්ග අනාවරණය කරයි.
ජනාධිපතිවරයෙකු පාර්ලිමේන්තු මන්ත්‍රීවරයෙකු ලෙස වසර පහක් සම්පූර්ණ කර ඇත්නම් ඔහුට මන්ත්‍රී විශ්‍රාම වැටුප හිමි වන අතර ඔහු විශ්‍රාම ගිය පසු ජනාධිපති ධූරයේ විශ්‍රාම වැටුප ද හිමි වේ.
මේ ආකාරයට තමාට විශ්‍රාම වැටුප් දෙකක් අවශ්‍ය නොවන බව අනුර කුමාර දිසානායක මහතා පාර්ලිමේන්තුවේදී පසුගිය 21 වැනිදා ප්‍රකාශ කළේය.
මන්ත්‍රීවරයකු ලෙස ලැබෙන විශ්‍රාම වැටුප ඉවත් කරන ලෙස අනුර දිසානායක මහතා පාර්ලිමේන්තුවේදී ප්‍රකාශ කිරීමට පෙර පාර්ලිමේන්තු මහ ලේකම්වරියට ලිපියකින් ද ඒ බව දැනුම් දී තිබිණි.
පාර්ලිමේන්තු මහ ලේකම්වරිය විසින් එම ලිපිය පාර්ලිමේන්තුවේ මූල්‍ය අධ්‍යක්ෂවරයා වෙත යොමු කර ඇත.