ඔස්ට්‍රේලියානු ව්‍යාපාරිකයෙකුගේ සමාගම් කොටස් ව්‍යාජ ඇටෝර්නි බලපත්‍රයක් සකස් කර විකිණීම තුළින් මූල්‍ය වංචාවක් කළ බවට චෝදනා ලැබ සිටි හිටපු අමාත්‍ය උදය ගම්මන්පිල අද කොළඹ මහාධිකරණය විසින් එම චෝදනාවලින් නිදොස් කොට නිදහස් කරන ලදී.
විත්තිකරුට එරෙහිව එල්ල කර තිබූ චෝදනා සාධාරණ සැකයෙන් ඔබ්බට ඔප්පු කිරීමට පැමිණිල්ල අසමත් වූ බව පවසමින් විනිසුරුවරයා විත්තිකරු නිදොස් කොට නිදහස් කළේය.
1996 සැප්තැම්බර් 26 සහ 1997 සැප්තැම්බර් 25 අතර කාලය තුළ ඔස්ට්‍රේලියානු ජාතික ව්‍යාපාරික බ්‍රයන් ෂැඩික් ගේ සමාගමක් විසින් මිල දී ගෙන තිබූ පෑන් ඒෂියා බැංකු කොටස් මිලියන 21 ක් ව්‍යාජ ඇටෝර්නි බලපත්‍රයක් මගින් විකිණීම තුළින් රුපියල් මිලියන 21 ක මුදලක් සාපරාධී ලෙස වංචා කළ බවට හිටපු අමාත්‍ය උදය ගම්මන්පිල සහ ව්‍යාපාරික සිඩ්නි ජයසිංහට එරෙහිව චෝදනා එල්ල විය.
ඉකුත් යහපාලන රජය සමයේ නීතිපතිවරයා විසින් මෙම නඩුව පවරන ලද අතර එම රජය සිදු කළ පලමු ආන්දෝලනාත්මක පත්වීම වන්නේ නීතිපති ධූරයට ජයන්ත ජයසූරිය මහතා පත් කිරීමයි. නීතිපති දෙපාර්තමේන්තුවේ සොලිසිටර් ජනරාල් තනතුර දැරූ සුහද ගම්ලත් මහතා නොසලකා හරිමින් ඔහුට වඩා කණිෂ්ඨ නිලධාරියෙකු වන ජයන්ත ජයසූරිය මහතා පත් කල බවට එවකට චෝදනා එල්ල විය.
මේ අතර මාලිමා රජය විසින් පත්කළ නව තානාපතිවරුන් දෙදෙනෙකුගේ සහ නව මහ කොමසාරිස්වරයෙකුගේ පත්වීම් සඳහා වන නාමයෝජනා පාර්ලිමේන්තුවේ උසස් නිලතල පිළිබඳ කාරක සභාව විසින් අනුමත කර තිබෙනවා.
ඒ, එම කාරක සභාව පසුගියදා (21) පාර්ලිමේන්තුවේදී රැස්වූ අවස්ථාවේදීයි.
එමෙන්ම ඇමරිකා එක්සත් ජනපදයේ නිව්යෝර්ක් හි එක්සත් ජාතීන්ගේ සංවිධානය සඳහා ශ්‍රී ලංකාවේ නිත්‍ය නියෝජිතයෙකු පත් කිරීම සඳහා වන නාමයෝජනාවද කාරක සභාව අනුමත කර ඇති බව සඳහන්.
ඒ අනුව, කියුබා ජනරජයේ නව ශ්‍රී ලංකා තානාපතිවරයා ලෙස ආර්.එම්. මහින්ද දාස රත්නායක මහතා පත්කිරීමටත්, ජපානයේ නව ශ්‍රී ලංකා තානාපතිවරයා ලෙස මහාචාර්ය පිවිතුරු ජනක් කුමාරසිංහ මහතා පත් කිරීමටත් උසස් නිලතල පිළිබඳ කාරක සභාව අනුමැතිය ලබාදී තිබෙනවා.
එක්සත් රාජධානියට අයත් මහා බ්‍රිතාන්‍යයේ සහ උතුරු අයර්ලන්තයේ නව ශ්‍රී ලංකා මහ කොමසාරිස්වරයා ලෙස එස්. ඩී. නිමල් උපාලි සේනාධීර මහතා පත් කිරීම සඳහා වන නාමයෝජනාව ද උසස් නිලතල පිළිබඳ කාරක සභාව අනුමත කර ඇති බවයි, පාර්ලිමේන්තු සන්නිවේදන දෙපාර්තමේන්තුව සඳහන් කළේ.
අමෙරිකා එක්සත් ජනපදයේ නිව්යෝර්ක්හි එක්සත් ජාතීන්ගේ සංවිධානයේ ශ්‍රී ලංකා නිත්‍ය නියෝජිතයා ලෙස හිටපු අගවිනිසුරු සහ ඉකුත් යහපාලන රජය සමයේ නීතිපතිවරයා ලෙස කටයුතු කල ජනාධිපති නීතිඥ ජයන්ත ජයසූරිය මහතාගේ නාමයෝජනාවද උසස් නිලතල පිළිබඳ කාරක සභාව විසින් අනුමත කර ඇති බව සඳහන්.