ඇමරිකානු ජනාධිපති ඩොනල්ඩ් ට්‍රම්ප් විසින් යෝජිත අන්‍යෝන්‍ය බද්ද නීතිය හඳුන්වා දීමත් සමඟ ශ්‍රී ලංකාවේ ඇඟලුම් කර්මාන්තය ඇතුළු අපනයන ක්ෂේත්‍රයට දැඩි බලපෑමක් එල්ල වනු ඇතැයි අපේක්ෂා කෙරේ. මෙම නව බදු ප්‍රතිපත්තිය අප්‍රේල් මාසයේ සිට ක්‍රියාත්මක කිරීමට නියමිතය.
මෙම ප්‍රතිපත්තියේ අරමුණ වන්නේ ඇමරිකාව සහ ශ්‍රී ලංකාව අතර පවතින වෙළඳ අසමතුලිතතාවය මඟහරවා ගැනීමයි. වාර්තා වන අන්දමට ඇමරිකාව වසරකට ශ්‍රී ලංකාවෙන් ඇමරිකානු ඩොලර් බිලියන 3 ක් වටිනා භාණ්ඩ මිලදී ගන්නා අතර, ශ්‍රී ලංකාව ඇමරිකාවෙන් මිලදී ගන්නේ ඇමරිකානු ඩොලර් මිලියන 600 ක් පමණි.
මෙම අසමතුලිතතාවය නිසා ඇමරිකාවට වාර්ෂිකව ඩොලර් බිලියන 2 කට වැඩි වෙළඳ පාඩුවක් සිදු වේ. එම පාඩුව පියවා ගැනීම සඳහා ඇමරිකාව ශ්‍රී ලංකාවෙන් ආනයනය කරන භාණ්ඩ සහ සේවා සඳහා වන බදු අනුපාත ඉහළ නැංවීමට බලාපොරොත්තු වන බව රාජ්‍ය තාන්ත්‍රික ආරංචි මාර්ග පවසයි.
මෙම නව බද්ද ශ්‍රී ලංකාවට පමණක් නොව ලොව බොහෝ රටවලට බලපානු ඇත. තවද, භාණ්ඩ හා සේවා සඳහා අය කරන වැට් බද්ද ද තීරු බද්දක් ලෙස සැලකීමට ට්‍රම්ප් පරිපාලනය තීරණය කර ඇත.