දඹුල්ල පොලිසියට ලැබුණු තොරතුරක් මත පදනම්ව, දඹුල්ල D4 ඇල අතුපාර ප්‍රදේශයේ පිහිටි දෙමහල් නිවසක පවත්වාගෙන ගිය මහා පරිමාණ කසිප්පු ස්කාගාරයක් වටලා එහි තිබී ගෝටා මිලිලීටර් ලක්ෂ 8 ක් පමණ සහ කසිප්පු මිලිලීටර් 15,000 ක් අඩංගු බෝතල් 20 ක්, කෑන් 1 ක්, දඟර 2 ක්, බැරල් 4 ක් ඇතුළු උපකරණ දඹුල්ල පොලිසිය විසින් අත්අඩංගුවට ගෙන තිබේ.
මෙම ස්කාගාරයේ හිමිකරු මෙවර දඹුල්ල මහ නගර සභාවට තරඟ කරන අපේක්ෂකයෙකු වන අතර, ඔහු දීර්ඝ කාලයක් තිස්සේ මෙම ජාවාරම සූක්ෂම ලෙස පවත්වාගෙන ගොස් ඇති බවට විශ්වාස කෙරේ. වැටලීම සිදු කරන අවස්ථාවේ ස්කාගාර හිමිකරු පැන ගොස් ඇති අතර, ඔහු දඹුල්ල මහ නගර සභාවේ 24 දෙනෙකුගෙන් යුත් ජාතික ජන බලවේගයේ කණ්ඩායම නියෝජනය කරන බවට තොරතුරු අනාවරණය වී තිබේ. ඔහුගේ බිරිඳ අත්අඩංගුවට ගෙන පොලිස් ඇප මත මුදා හැර ඇති අතර, එළඹෙන බදාදා අධිකරණය හමුවේ පෙනී සිටින ලෙසට දැනුම් දී තිබේ.